Halbwegs fertig - so churz, doch so lang

Da isch d Hälfti scho ume!
Hüt bzw. gester sinds genau 5 Monät sit mim Abflug und de Zuefall wotts dass es au no genau 5 Monät sind, bis ich wider dihei lande. Also mal Zit s Halbiziit-Fazit z zieh.
Wo ich vor 5 Monät abfloge bin, het ich nie erwartet, dass de Uustusch so isch, wie sich usegstellt hed. Ich weiss allerdings au ned wirklich, wie ich mier das vorgstellt han, also seid das ned vill us. Generell chamer sege, dass es unvergesslich isch, aber doch vill meh Alltag als mer sichs villicht denkt.
Die erschte drü Monät han ich mit de Family Foxcroft zemeglebt. Sie sind wirklich all mega nett gsi und mier hend eus recht guet verstande. Leider isch es aber nach drü Monat de besser Weg gsi wegzzügle, weg d Foxcrofts sehr aktivi Skier imene private Skiclub sind, und Skipass und Equipment leider vill zu tüür gsi wär.
Afang Dezember hets de gheisse zügle zu de Family Shoreman. D Ziit dete isch au recht schön gsi, Wiehnachte und Neujahr han ich sehr chönne gnüsse und ich has mit de Family eigentlich immer recht guet. Leider isches vo ehrere Site halt ned so gsi, ich weiss no emmer ned wieso. Am 1. Januar, die perfekti Neujahrsüberraschig, hets für mich userem heitere Himmel gheisse, ich müesse wider zügle. Ich hans zersch ned wirklich verstande, s denn müesse akzeptiere. Generell rüehrt die ganz Sach am Schluss und das fehlende Vertraue es sehr schlechts Liecht uf die Zit mit de Family Shoreman.
Am 3. Januar bin ich also wider züglet zu de Family Tustin. Sie lebed schön ide Stadt, so be ich in Laufdistanz zu de Downtown, was ja recht guet isch. Generell han ichs da mit Family au recht guet, sie sind au luschtig und nett. Es git so es paar Problem, allerdings denk ich im Moment, dass mer die us de Welt schaffe chönd und die Zit da schön wird.
Generell isch Kanada eifach so geil! Meh cha sege, dass de Stereotyp, dass sie die nettiste Lüüt uf de Welt sind, stimmt. D Asammlig vo nette Lüüt isch da wirklich unglaublich und die meischte Lüüt sind so offe und meh hed wirklich keis Problem in es Gspröch z cho, au wem er d Persone ned kennt. Ich muess sege, dass d Lüüt im Verglich zu da doch eher stiief und ignorant sind. Ich weiss jetzt scho, dass ich Kanada nach em Uustusch ganz sicher ned eifach so wird vergesse und hoffentlich au meh als einisch wieder zrug chume.
S kanadischste Ding wür ich sege, isch chli komisch, aber isch ganz sicher Tim Hortons. Tim Hortons isch eigentlich en Starbucks, aber vill billiger und viiiiiill besser. Tim Hortons Cup findet mer wirklich überall, ob Schuel, Ishockeymatch oder Skifahre. Ich selber han mich scho mega dra gwöhnt für en lengeri Fahrt sicher ei mal bem Tim Hortons Drive-trough azhalte und sich en heissi Schoggi z hole. Und denn gits au Timbits, so en Snack, eifach s beschte für zwüschedüre! Ich weiss wirklich no ned wie ich mir Tim Hortons wird abgwöhne :-(. Wahrschinlich wird ich mier au no churz vorem Abflug en Tim Hortons Extra Large Hot Chocolate hohle, nur ums no es letscht mal z gnüsse.
50% verbi, 50% to go und ich freu mich druf!
Chlises Update sit em letzte Post: Alltag isch wider ikehrt. Wie gseid gits es paar chlini Problem, aber nüt devo isch wirklich schlimm! Momentan han ich chli lenger frei, weg ich Abschlussprüefige ned muess schriebe. Am nechste Mendig ghads mit em 2. Semester witer. Ich han Fotografie, Gym, Fitness und Französisch als Fächer und ich hoffe, glaube, weiss, dass es recht eifachs Semester wird, aber was söll ich schwirigi Fächer neh, wenn sich doch eigentlich eh niemer für mini Note bzw. die gwählte Fächer interessiert.
Ich plane au gli freiwillig für es Tierheim afo z schaffe, weg ich chli meh Freizitbeschäftigung bruche und sich um Chatze kümmere, tönt doch guet. Generell cha mer da leider im Winter ned vill meh mache, als Skifahre und das chan ich generell wege fehlendem Pass und Usrüstig nur sehr beschränkt mache, wegs schnell is Geld ghad.
Die letschte wuche hemmer au chli meh Schnee und chälteri Temperature gha, es isch für mich meh kanadische Winter gsi als bisher. Nur als es Bispiel:

Am nechste Morge isches sogar -24 Grad gsi und ich bin natürlich id Schuel gloffe.

Zahnpasta-Magie, Festtäg und erneute Familiewechsel

So, das mal wider chli gliner! Das mal isch aber au meh passiert idere churze Zit, als ide zwei Mönat davor.

Zerscht muess ich no erwähne, dass mini Zahnpasta no emmer ned leer isch und das trotz regelmässigem Zähputze. Ich glaub Elmex hed da irgendwie chli Magie ibaut, dass mer emmer no meh Zahpasta findet, mer gnueg fest probiert.
Und jetzt mal chronologisch was sit mim letschte Iitrag so passiert isch. Wiehnachte isch ned schlecht gsi, wenn au andersch als ich mier gwöhnt bin. Am Heiligabig wird nur eis Gschenkli uspackt und das isch traditionell es Pyjama... All andere Gschenk mitsamt Strumpf werdet am Wiehnachtsmorge uspackt. Im Strumpf sind villi chlini sache wie zum Bispiel en Rüggechratzer (eis vo de beschte Wiehnachtsgschenk ever!) und Süessigkeite und so.
Wie dihei isches a Wiehnachte au so, dass mer sich mit de Familie trifft und weg ich ja de Uustuschschüeler bin, bin ich natürlich ah jedes Familietreffe mitgange. Zwüsche Wiehnachte und Neujahr isch de für zwei, drü Täg wieder chli normalers Lebe gsi.
Denn simmer au no im "grösste Skigebiet vo Ontario" go Skifahre, aber für die meiste Schwiizer isch das eifach en Witz. Skilift uffe, abfahre, astaht, glichi Skilift uffe, abfahre... Und de priis isch de au no recht stolz für so es chlises Skigebiet.
A Silvester hemmer fein gesse und denn de Countdown vom Times Square im TV gluegt und recht gli nach Mitternacht hend sich de au scho die meischte is Bett verzoge.
Am 1. Januar heds für mich de au scho die erscht grösser Überraschig vom neue Jahr geh. Nachdem all Gäst gange sind und ich mich zrug i mis Zimmer verzoge han für chli Rueh, isch d Gastmuetter inecho und hed zämefassend gseid, dass ich am Donnschtig zügle muess, weg sie "too busy" für s Hoste sind. Ich han zersch gar ned gwüsst wie reagiere, has zerscht gar ned realisiert. Churz später isch mer de bewusst worde, was das heisst und da hend mer de meh oder weniger all Alarmglogge glütet. Ich han ja glehrt, mer sötti be Problem während em Uustusch nid grad d Eltere informiere, aber wer wür be söttige News andersch reagiere. Am nechste Morge han ich de de Wendy, minere Koordinatorin aglüte und sie hed mer de gseid, dass sie au kei witeri Gründ für mich hed und dass sie alles versuecht hed mit de Gastmuetter z rede und z überzüge, wenigstens versueche allfälligi Problem mit mier und ehre z bespreche. Aber aschinend hed sie das ned welle. Sie het mir de no chli über die neu Gastfamilie verzellt und dass sie mich murn chund go abhole. Ich han denn entschiede, halt mal afange z packe und denn halt mal luege wie d Situations ich entwickelt. Bin de meh oder weniger eifach im Zimmer umeghange, ich han eigentlich kei Kontakt mit de Family welle. Ned be sonere fuule usred und dem aschinend gspillte nette Verhalte... Am nechste Tag hed mich de d Wendy abgholt und während de Fahrt zu de neue Gastfamilie hed sie mer de au verzellt, dass sie nach witere Gründ und Bispiel gfragt hed. D Gastmuetter hed ehre es paar Gründ geh und wemmer die dureliest, denkt mer sich dass ich en absolut schreckliche Uustuschschüeler muess si. "Uninteressiert in Kultur und Lebe in Kanada, ned offe für anderi Meinige und Vorschläg und ich verbringe z vill Zit ah Computer und Skype (!?) z vill mit Family und Kollege". S einzig wo ich denke, dass es villicht wahr si chönnt, isch d Sach mitem Computer. Allerdings muess ich da sege, dass ich die meischt Zit im Wohnzimmer umeghanged bin, aber anstatt stupides amerikanisches TV zluege, han ich halt chli meh Zit am Computer verbracht. Ich ha de Familie scho ganz am afang gseid, dass ich ned so vill TV luege... Skyped han ich während dere Zit praktisch nix und au die andere  Pünkt verstah ich sowit ned. Die jetzig Gastfamilie und au die erscht hed mer gseid, dass sie mich gar nie so erlebt hend und nie so öppis denkt hend. Also bitte fraged ned mich, wenn er wend wüsse, wieso die Familie mich usegrüehrt hed... Ich chönnt nur rate.
Die neu Familie isch aber sowit ganz nett. D Marion isch offiziell mini Gastmuetter. Sie isch en älteri Frau, scho pensioniert, aber recht aktiv in Freiwillige Arbeit und Chile. Ehre einti Sohn und Schwiegertochter lebed im gliche Huus. Sie sind letschte Herbst vo British Columbia zrug uf Ontario zügled. Generell sinds sehr luschtig und sie hend mer au versproche mit mier über Problem z rede, wenns de mal Problem sött ghä. Ich hoffe und glaube sehr fescht, dass ich da ned i die glich komisch Situation inerutsche wie be de letschte Familie. Ich freu mich scho uf die nechste paar Monat da.
Gester hed mich de au d Grippe s erscht mal da verwütscht und so han ich natürlich s feine Znachtesse be de erste Gastfamilie verpasst, aber das wird nahgholt!
Die Wuche han ich au mis Abflugdatum bestätigt becho. Ich flüge am 28.Juni ab und chume am 29. am Morge um 10.45 ah. Aber bis denn isches ja no immer chli meh als d Hälfti vom ganze Uustusch.
Es geb no viiil z verzelle, aber ergendeinisch muess da jetzt au mal wider fertig si...