Do I Look Forward To Go Home?

The most common question I got to hear changed a lot during my exchange. At the beginning it was: "You are from Switzerland?", it moved on to "Do you have TV/Internet/Cars... in Switzerland?", then "Do you have snow?", around Christmas it was "Do you have Christmas?". After New Years it continued with "When do you go home?" and this was one was also very common: "Wait, your Swedish, right?" Now in like the last month it changed again to "Do you look forward to go home?" This questions seems an easy one, but it's actually kinda hard to answer it."Yes, but no" would be my answer I guess.

I look forward to go home, because I really miss my family, my friends, the cat... It's not like I would cry all the time, but I didn't see them face to face in the last 9 month. It's a different kind of missing. It's more like a need to see them again, to see how they changed or how they didn't. I have a great host family and great friends over here, but it's just not the same, because I spend all my days with them. I see them every day and I have fun with them right now. But Skype and texting really can't replace a real face-to-face conversation. And here we are at the point, that I say ", but no." I know, after some time at home, when the life changes back to normal, I'm gonna miss all the people here. I know, that I'm not coming back for at least one year, and when I come back I might be in the area for 5, 6, 7 days, but it's never gonna be the same as it is right now. I won't have a weekly movie Tuesday, I won't go to school with the people here. I normally say "You want, what you don't have." I really want to see my family and friends at home again, but when I "have" them back, I'm gonna miss the people here.
But there is also lots of stuff worth mentioning besides people. One example, I really, really, reeeeaaaaally miss my independence. At home I can go out and come home when I want, basically. I don't need my parents or a friend to drive me to places. I just go out, take the train or the bus and go where I want. Here I can't do that, because public transportation here is nearly non-existent. There is no bus, subway, train, anything, which would bring me from Nottawa to Collingwood, except the bike or the car. I'm not allowed to drive, so I have to ask my host parents to drive me. That's not a problem in most cases, but I would still prefer, to not be depended on my host parents.
Another example: Since about two years I live with a "time-limit". One year before the exchange I knew, that I would go on exchange, so I couldn't plan anything "long-time". Easiest way to explain, what I mean: Why should I buy my own TV, when I leave in a year? It's hard to explain why this is a problem for me or why that is reason, that I look forward to go home, but it just is.
And now to the last point, that I'm going to mention here. My educational "career" is in Standby mode right now. I don't get anything out of this exchange, except the improvement in English and all the experiences I got here. But besides of English, I'm as far in my education as I was a year ago. This was actually a great feeling at the beginning, because that also meant, that I don't have to care about my marks. But by now, after 10 months break (my summer holidays included), it is time, to finally go on again.

It's hard to explain why "Yes, but no". I think the easiest way to summarize it is, I do look forward to go back not because Canada or the people here suck, but because Switzerland is extremely awesome too!

I look forward to another great month in a great country!

Montreal-Trip

D Schoggi isch mittlerwile alli gange und ich "muess" weder kanadischi Schoggi esse. Isch luschtig, wie unterschiedlich gschmäker chönd si. Hend er zum Bispiel gwüsst, dass Schoggibrot aschinend en komplett grusigi Idee für Kanadier isch (okay mitem Gummibrot isches au ned so guet wie dihei). Au susch isch eigentlich bis zum letschte Wuchenend komplett de Alltag wieder ikehrt. D Hostfamily isch langsam ide Bikesaison acho (Mendig, Mittwoch Ussetraining, Mittwuch und Wuchenend renne). Bin froh, da ned alles mitzmache z müesse.

S letschte Wucheend isch glaub eis vo de beste Weekends ever gsi!
Am Donnschtigabig heds aber zersch no es Schwizer Esse geh, zumindest han ich versuecht, s best mögliche usem verfüegbare Esse z mache. Leider hed d Jillian ned Hörnli sondern Penne kauft, also heds halt Ghackets mit Penne geh. Und leider isch d Hostmother au chli crazy wege Sodium im Esse, also han ich d Penne ned döffe im Salzwasser choche bzw. nachem choche salze. Isch chli faad gsi das ganze, aber trotzdem ned gaanz so schlecht.

Nach ufrume und überhetztem Packe hends mich denn uf Barrie zu de Wendy, minere Coordinatorin gfahre, zum dete Übernachte.
Am Fritigmorge am sechsi isches losgange mit de Abfahrt uf Toronto. Det simmer denn inen Bus umgstiege und los uf Ottawa gfahre zum Mittagesse und anderi Schüeler mitzneh. Die vier stund uf Ottawa hend sich chli zoge aber isch doch recht luschtig gsi. De Busfahrer isch chli en komische gsi, er hed die ganz Zit versuecht mit de Wendy z flirte, ihre isch das chli unwohl gsi natürlich. In Ottawa isches zum Subway gange und nachher no en churze Spaziergang rund ums Parliament.

Und denn hemmer natürlich no die berühmte "Beaver Tails" probiert, en süessi Aglegeheit!

Nachher isches nomal +/- 2 Stund Busfahrt uf Montreal gsi. Isch aber immer luschtiger worde, weg mer au immer meh is Gspröch cho isch.
Am abig hed mer eigentlich sölle in Notre Dame Basicilla go en liechtshow luege, aber leider hed sich de Busfahrer wahrschinlich z fest mit flirte abglenkt und hed sich verfahre, so simmer de z spaat gsi für d Liechtshow.

De Busfahrer isch zu eus andere eigentlich ganz luschtig gsi. Er isch ned dick, nei er isch "fluffy". So hed sich denn de Spitzname BigFluffy entwickelt.

De rescht vom Abig hemmer denn mit umebummle ("gässle") verbracht und denn isches zrug zum Hostel gange, aber de Spass isch denn erscht los gange.

Nachdem mer no chli mit de Wendy umeghanged sind, isches recht pünktlich Mitternacht is Bett gange. Ich han grad mal 5 Minute probiert z schlafe, wo de Japaner uf de andere Site vom Zimmer ufstahd, "Oh Shit" seid und ab is Badzimmer seckled. Det isch ehm de praktisch alles wo ehr gesse hed de Tag lang wider ufecho. Ich bin go d Wendy hole und sie und de Baptiste (de Co-Begleiter) sind abecho i euses Zimmer. Also heds de zersch mal gar nüt Schlafe gheisse. Während ganze Usefinde wieso er kotzt het und de Versuech alles ufzputze, han ich müesse ufs WC. Euses Badzimmer isch natürlich no immer bsetzt gsi, also bin ich in Wendy's Ruum gange. Sie hed mer allerdings ned gseid, dass s WC ned wirklich funktioniert. Und so isches cho wie s hed müesse cho, s WC isch z Morge am 1 verstopft. Nach einigem Flueche bin ich de zum Frontdeck gange und han gmeldet dass s WC verstopft isch. Nachher han ich en Halb Stund im Hostelbsitzer zuegluegt wie er versuecht hed s WC z flicke (mier reded da immer no vom Morge am halbi 2). Er hed schlussendlich ufgeh und ich han endlich wieder zrug is Bett chönne. De Japaner isch au weder halbwegs okay gsi und hed sich au is Bett zrugzogge und so simmer de schlussendlich alli am Schlafe gsi. Am nechste Tag hed mer d Wendy denn gseid, dass sie i ihrem WC en Gable (also en richtige us Metall) gfunde hend. Da sind wohl Dubble i dem Zimmer gsi.
Die guete News isch, dass das s einzige schlechte gsi isch und s vo denn ah eifach genial gsi isch. Am Samschtigmorge simmer ab go shoppe ide Rue St.Catherine, das isch glaub die lengscht Ichaufsstrass, wo ich je gsi bin.
Zum Zmittag isches is O'Noir gange, es Restaurant komplett im Dunkle. Hans trotzdem miteme Föteli versuecht ;-)

Das isch en wirklich interessanti Erfahrig gsi, au wemmer s Esse nid wirklich chan gnüsse, weg mer die ganz Zit am Sueche nachem Esse, Bsteck, em Wasserglass oder em Tisch isch und s Esse mehrheitlich mit de Händ isst. Isch aber trotzdem luschtig gsi, weg mer halt die genial Idee gha hend, ufzstah und anderi z verschrecke oder s Dessert vom Gegenüber z probiere.

Insgesamt mit de Wendy und em Baptiste simmer 18 Lüüt gsi. 6 us Japan, 1 Holländer, 1 Dütsche, 3 Australierinne, 1 Brasillianerin und mier 3 Schwizer. En guet gmixte Gruppe und d Sprach zum Unterhalte isch wirklich fasch immer Englisch gsi (usser die 4 Japanerinne, wo nur japanisch gredet hend, aber so hends sich halt selber us de Gruppe usgschlosse, die beide japanische Jungs hend beid eigentlich immer Englisch gredet). De Schwarzi Maah uf dem Bild isch euse Chellner gsi.

Am Namitag isches denn zum Olympische Zentrum gange, wo mer uf de Turm ufegange sind (natürlich, mier sind ja 100%igi Touriste).

D Ussicht isch doch recht kuuhl gsi.

Nachher wär eigentlich s Planetarium ufem Plan gstande, aber da isch leider zue gsi. Han ich ned zuu schad gfunde, bin ja ned so en Sterne-, Planetefan.

Also zrug zum Hostel und denn zumene chline, typische Restaurant. Natürlich han ich mier Poutine bstellt, dass muemer schliesslich mindestens eimal esse wemmer in Montreal isch. Poutine isch aber eigentlich ned wirklich mis lieblingsesse (hed wohl au demit z tue, dass ich ned wirklich gern Pommes Frittes han).

Mis Gsicht i dem Bild isch ja mal weder unglaublisch hübsch...

Nachher simmer a Hafe wo euses Boot für de "Dance-Cruise" agleit hed. De Dance-Cruise isch mega cool gsi, au wemmer ned wirklich tanzt hend. Mier sind umegsesse, hend de Ussicht und d Atmossphäre dusse gnosse und vill vill Bilder gmacht... Ich chan euch d Bilder mal persönlich zeige, aber die alli da izbinde duret defintiv z lang (isch mittlerwile scho weder nach de 10...). Nachher simmer no Glace (wie lang ich jetzt han müesse überlege, bis ich das Wort gfunde han, maaan) go esse und denn ab is Bett (vorallem d Jungs sind natürlich sehr müed gsi). Die Nacht isch sogar ohni Problem verlaufe, so dass mer es chlises bizelli Schlaf hend chönne ufhole.

Am nächste Morge heds gheisse, mier müend Packe und denn gömmer. Denn simmer z ersch uf de Mont Royal chli go umelaufe ("hike", ja klaaar). Recht schöni Ussicht vo det obe.

Nachher simmer zu de St.Joseph Chile (oder wie au immer die heisst). Isch en recht kuuhli Chile, au wenn ich mich ned wirklich defür interessiert han. Zum Zmittag heds es Sandwich mit richtigem Brot geh (d Auge vo de Europäer bem Ablick vo richtigem Brot sind all seeehr grosse worde). Also mit richtigem Brot mein ich Brot wo ned ipackt und vorgschnitte isch, sondern halt so chnusprigs, guets Brot.

Zum Abschluss simmer nomal zu de Notre Dame Basicilla, so dass mer au de touristischi Punkt gseh hend.

D Fahrt zrug uf Toronto isch wie im Flug vergange und wemmer glaub knapp 8 Stund brucht hend. Mier hend luschtigi, ernsti und sarkastischi Konversatione gah. Und nach de Autofahrt zrug uf Barry simmer knapp am halbi 12i wieder zrug gsi. Aber neeei, natürlich han ich no zrug uf Nottawa müesse, schliesslich isch mini Gastmuetter so nett und hed mich denn no abgholt. Am halbi 1 bin ich de wirklich dihei gsi und ab is Bett. Zum glück hed mich d Gastmuetter lah usschlaffe, so han ich doch no chli schlaf becho.

Uf de fahrt hei, hemmer d Wendy überzügt no en vierti Trip z organisiere. Ned vill Organisation, nur zu ihrem Cottage im Norde. Wär wirklich genial, wenn das z stand chund.

Alles in allem isch das Weekend de absolut hammer gsi. D Hostfamily und s Diheime isch ja perfekt, aber trotzdem han ich eigentlich ned wirklich hei welle. Und denn isch ja d Schuel weder, wo d Französisch Lehrerin grad in Crazy-Mode gstellt hed, aber zum Glück muess ich ja ned wirklich uf mini Note luege, so dass ich s mer chli eifacher cha mache.

Schoggi, Schoggi, Osterhaas!

Melde mich mal wider :-P

Momentan gnüss ich jetzt grad de zwei "Schnee"-Tag in Folg (und das im April...). Geschter heds nid wirklich Schnee gha, aber hüt znacht heds doch wirklich nomal gschneit. S Wetter hed wohl ghört, dass es ide Schwiz letscht Wuche no Schnee gha hed, also schneits die Wuche be eus nomal, nur zum zeige, dass es da de lengscht Winter hed. Mier gnüegleds eigentlich so langsam.
Isch ja scho es Zitli, sit ich mich s letscht mal gmeldet han...
Rund um min Geburtstag ume isch "Spring"-Break gsi. Nur, dass es no immer knapp 10cm Schnee gha hed und d Temperatur ned wirklich über 0° gstiege isch. Vo "Spring" z rede wär also chli übertriebe. Die erscht Hälfti vo de Ferie han ich mehrheitlich dihei verbracht, weg all mini Kollege praktisch 24/7 am Schaffe sind über d Ferie und s Wetter ned vill meh als Skifahre zuelahd. Vom Mittwuch ah bin ich denn au go Skifahre. Allerdings ned im öffentliche Blue Mountains sondern im private Skiclub, wo mini Familie scho sit Generatione Mitglieder sind (also glaub zrug bis zu de Grossmuetter vo de Hostmom). Hützetags zahlt mer so vill für d Itrittsgebühre, dass sich das normalsterblichi Familie nümm wirklich leischte chönd. Allerdings verstahn ich immer no ned wirklich wie mer be somene chliiine Skigebiet jedes Wucheend cha skifahre. Meh schafft jedi Abfahrt pro Tag sicher zwei mal ohni Problem, wemmer wott. Au a mim Geburtstag simmer go skifahre. Am Abig hets den Tacos gäh, wo ich mier gwünscht ha und en Zitronechueche. Han mier de es bizeli andersch vorgstellt, meh halt so wie dihei, aber isch trotzdem guet gsi :-)

Und denn isches as Gschenkliuspacke gange :) Ide Wuche vorem Geburtstag bin ich drü Mal zum Poschtoffice glaufe um d Päckli abzhole. Eis devo isch aber für Ostere gsi und zu dem Thema chum ich denn nachher. Ich muess sege, die beide Gschenkli vom Gotti und Götti sind wirklich super :)

D Willisauer-Ringli sind jetzt da als "the hardest cookies in the world" bekannt und d Schoggi isch jetzt no ned ufbrucht. S guete isch, dass die meischt Schoggi mit Nüss isch und die hed d Family ned gern :-P. Für mich isches jetzt Heiweh-Schoggi. Wenn immer ich Heiweh han (oder au wenn ned), iss ich es reiheli oder zwei. Und ich chume wahrschinlich mit meh Zahnpasta hei, als ich ursprünglich da ehne cho bin :-P. Danke nomal vill mal für die tolle Gschenkli. Es paar Tag später isch denn no s Päckli vom Nathalie acho miteme Mad-Magazin. Denn han ich natürlich müesse erkläre, wieso Mad, allerdings findet das die Familie doof (puuh!). Und denn han ich no d Upside-Down Charte vo de Eltere becho, mit Australie als Top of the World und mit Süde obe anstatt vom Norde, das isch mal en interessanti Perspektive :-P. D Weltcharte da ehne hend all Europa als Zentrum, was ja au Sinn macht. Wenn Kanada im Zentrum wäre, würd ja Eurasie ide Mitti durekafflet werde.
S Wucheend bin ich natürlich au nomal go Skifahre (natürlich) und denn isch d Schuel wider losgange und damit de Alltag. D Schuel isch immer no so wie s letscht mal beschriebe. Langsam wird ich fitter und in Fotografie weiss ich immer no meh als d Lehrerin (wenn die hützutag müesst Fotografie studiere, wür sie duregheie) und Franz han ich halt immer no ned gern.

Jetzt zu de Gschicht, wieso ich Chatze immer no vor Hünd bevorzuge. Chatze und Hünd sind ja beid allergisch uf irgendöppis in Schoggi. Chatze sind aber wenigstens schlau gnueg Schoggi ned z esse. Also, uf was ich usse wott: D Eltere hend mer es Päckli für Ostere gschickt. Ich han natürlich scho denkt, dass det Schoggieili und sicher au en Schoggihas dine isch. Aber ich han natürlich ned a de Hund denkt. Also han ichs Päckli be mer im Zimmer ah Bode gleit und denn simmer uf Bsuech zunere andere Family. Spot am Abig simmer de wider zrug cho, ich bin i mis Zimmer und denn han ich mich zersch mal gwunderet, wieso da Karton überall ufem Bode umlit. Denn han ichs Päckli gseh:
 

Das wär also min Oskar Schoggihas gsi :(. Knapp 5 Sekunde nachdem ich usegfunde ha, was passiert isch, ghör ich vo d'obe: "IIh, de Hund hed kotzt". Am Schluss hemmer im ganze Huus Ort gfunde, wo das passiert isch. Zum Glück isches Wiisi Schoggi gsi, susch wär de Hund jetzt höchstwahrschinlich tot. De zweiti Versuech isch also gscheiteret ;-). D Schoggieili sind zum Glück verschont bliebe, also han ich denn doch no chli Ostere gha.

Nach de Ferie isch d Schuel witergange und somit de Alltag. Es gäb einiges z brichte drüber, aber ich ha scho sooo vill gschriebe und s meischte isch schriftlich ned eifach z beschriebe. Ich machs de gern mal mündlich.

Jetzt grad gnüss ich die beide Schneetäg und denn chund nos Wuchenend. Yey :)!

Zügel hie, Zügel da

Wie de Titel scho seid, bin ich grad scho weder zügelt. Das mal ned zunere neue Family sondern zu de altbekannte Foxcrofts, also zrug zu minere erste Familie.
D Familie Tustin isch recht nett gsi und ich han au en gueti Zit gha, allerdings han ich meh und meh gmerkt, dass es für mich eifach ned passt. Es git ned wirklich Gründ defür und ich han mit de Familie au drüber gredet, aber schlussendlich nacheme Gspröch mit de Wendy und mit de beide Families han ich mich de entschiede, dass es wohl besser isch "hei" z gha zu minere erste Family. Jetzt bin ich also weder be de Foxcrofts in Nottawa, wo s jetzt sogar neuerdings Google Street View hed (http://goo.gl/maps/nVwYw) Es ischs Huus a de Ecke, d Nummere 55.
Was gits susch so interessants neus z brichte? S neue Semester hed agfange, aber mit Fotografie, Gym, Fitness und Franz chamers ned wirklich Schuel nenne. Fotografie isch chli en Witz weg mier hauptsächlich d Bedienig vo Photoshop lehred und ich das allerdings scho besser chan als d Lehrerin. Französisch isch recht luschtig, weg de Kanadisch Akzent seehr gewöhngisbedürftig isch. Was ich damit meine isch, sie seged zum Bispiel "peut-être" wirklich miteme "etre" am schluss und ned wie bem parisische Französisch "etche". Isch recht schwirig z beschriebe schriftlich, aber es isch recht lustig. Mit Gym und Fitness wird ich uf Endi Semester de sogar no recht fit. Au wenn d Turnhalle recht alt isch und s Material naajaa nümm im beste Zuestand isch, muess das eim ja ned abhalte vom trainiere.
Ob ehrs glaubed oder ned, ich gwöhne mich sogar langsam ad Schueluniform und ich muess sege, so langsam find ich sie scho gar nümm schlimm. Ich finde eigentlich so en standardisierte Look hilft zur Konzentration ide Schuel und git de Schuel au meh zemehalt. Und wie gseid, es isch ned en wirklich schlimmi Uniform. Han da mal es Bild zums chli gnauer beschriebe:

So gsehd eigentlich mini Winteruniform us. Es git verschiedeni Variante wie blaui Hose, Hemli, Jäckli, Polohemder und einiges anderes, aber ich ha mich für die fuul eifach Version entschiede. Fraue chönd die gliche Sache trege wie d Jungs, hend aber au en blaue Rock und einigi anderi Sache zum trege. Generell gits nebe de offizielle Regle no die inoffizielle Schüelerregle, zum Bispiel treged die meischte Jungs kei blaui Hose, Fraue träged kei Khaki Hose.

So neb de Schuel gits eigentlich kei grossi News. Be de Tustins hed mich s Mami mitere spezielle Lieferig überrascht. Eines Namitags wo ich vo de Schuel heicho bin isch es Päckli us de Staate umeglege und ich han mich scho gfragt, ob ich öppis bstellt han und denn vergesse, aber nachdem ichs ufgmacht han, han ich realisiert, dass das Päckli wohl us de Schwiz us bstellt worde isch. Nach chli meh als ere Wuche ab und zue dra schaffe, isch de das usecho:

Gueti Überraschig :)

Chli länger vor dere Überraschig isch no es anders Päckli acho, es Anti-Heiweh-Set. Wer ah Schoggi oder Plüschtierli denkt, lit allerdings e chli falsch.

D Idee han ich ja sogar selber geh mit minere Klag weg de Zahnpasta (de Trick chamer villich chli witerfüehre: Geg mis Heiweh würed vier Kilo Schoggi au no sehr helfe :-P )

Han au no susch es paar Föteli vom Alltag gmacht, das chund jetzt hoffentlich generell chli meh

Min erscht Alkohol in Monate :-P

Und das ischs Resultat vo dem Mini-Fondue. Ned wirklich grossartig gschmackli, aber no immer besser als die Fondue wo mer da ene findet.

S Depot vo de typisch amerikanische Schuelbüs.

Das isch MIN Tim Hortons. Das isch also de Lade wo ich vo Monate drüber rede. Mer findet Tim Hortons wirklich praktisch überall und für mich ischs und bliebt s kanadischte Ding (ned mal d Iglu und Polarbäre im Garte chömed dra ehne :-P)

Und das isch en Extra Large Hot Chocolate Becher. Extra Large nur, weg die grad es gwünnspiel hend und ich bem öppe 10. Becher endlich mal en gratis Hot Chocolate gwunne han. Das muemer denn au nütze und nimmt natürlich de gröscht Becher.

"New Chocolate Dipped Bacon", seriously? Ich meine d Schoggi wo de Lade (Candy Factory und ned öppe Subway) verchauft, isch ja ned schlecht, aber was für grusigi Idee isch denn das? Ich wär no fasch in Lade gange und het so eine kauft zum Probiere. Aber han mich schlussendlich ned dezue chönne überzüge.

Wie mer gsehd, bin ich uf fasch keine vo mine Bilder. Das lit ganz eifach dra, dass ich ned fotogen be, wie all wüsed, wo mich kenned. Sorry, aber da isch nix dra z ändere.

Jetzt no es paar Bilder vo mine Wohnstätte.

Das isch s Huus vo de Family Tustin wo ich die letschte zwei Monat gsi ben. Ned wirklich gross, aber defür es pinks Garagetor :-P

Das isch mis Zimmer gsi. Wie s Huus ned bsonders gross, aber gmüetlich.

Da no us de Perspektive vo de Tür.

Das isch mis Zimmer jetzt (riiiiiiiiesiiiiiiiiiiiiiiigs Bett). S Huus chamer be Google Street View bzw. witer unde aluege. Werde de im Früehlig wenn alles blüeht no eis oder zwei Föteli mache.

Das isch min Heiweh/Familie Egge mit de drü Plüschtierli (Engeli: Min ständige Begleiter sit Jahre, Schaaf: Vom Mami bem Abflug becho :'-( und s Bärli vom Nathalie ebefalls bem Abflug). De Bilderrahme isch mis Abschlussgschenkli und isch wirklich s beschte gege Heiweg.

So that's it vo de Belder.

Susch gits au nümm vill z brichte. S Lebe da ghad witer, und ich freu mich scho riesig uf die vier verbliebende Monat. Ich bin a de Schuel jetzt im Badminton-Team und evtl mach ich au no bem Rugby-Team mit (ich weiss scho öpper, wo da dagege wird si :-P ). Generell merk ich so langsam dass ich wirklich Englisch flüssend beherrsche jetzt und meistens nümm muess drüber nahdenke was ich jetzt eigentlich schnörre (usser früeh am Morge). Zum Bispiel erkenn ich jetzt au Akzent (de Britisch Akzent isch ja mal ganz schlimm :-P ). Und han au scho so einigi Kanadischi Gwohnheite igfange wie "See ya" oder de übermässig Gebruch vo "Like". Like cha mer bem kanadische Englisch wirklich überall isetze. "Yesterday I met this man and he was like thiiiis big." "Like, seriously?" "Yeah I really didn't like that." "Did you, like, speak to him?". Chli es schlechts Bispiel, aber meh gsehd dass like wirklich fasch überall gebrucht wird (eigentlich toppt das nur s F-Wort). Wenn ehr je mal müend wüsse, wenn like richtig brucht wird, fraged eifach ned mich. 

Und mit dere Sach verabschied ich mich und meh liest sich bald!

Halbwegs fertig - so churz, doch so lang

Da isch d Hälfti scho ume!
Hüt bzw. gester sinds genau 5 Monät sit mim Abflug und de Zuefall wotts dass es au no genau 5 Monät sind, bis ich wider dihei lande. Also mal Zit s Halbiziit-Fazit z zieh.
Wo ich vor 5 Monät abfloge bin, het ich nie erwartet, dass de Uustusch so isch, wie sich usegstellt hed. Ich weiss allerdings au ned wirklich, wie ich mier das vorgstellt han, also seid das ned vill us. Generell chamer sege, dass es unvergesslich isch, aber doch vill meh Alltag als mer sichs villicht denkt.
Die erschte drü Monät han ich mit de Family Foxcroft zemeglebt. Sie sind wirklich all mega nett gsi und mier hend eus recht guet verstande. Leider isch es aber nach drü Monat de besser Weg gsi wegzzügle, weg d Foxcrofts sehr aktivi Skier imene private Skiclub sind, und Skipass und Equipment leider vill zu tüür gsi wär.
Afang Dezember hets de gheisse zügle zu de Family Shoreman. D Ziit dete isch au recht schön gsi, Wiehnachte und Neujahr han ich sehr chönne gnüsse und ich has mit de Family eigentlich immer recht guet. Leider isches vo ehrere Site halt ned so gsi, ich weiss no emmer ned wieso. Am 1. Januar, die perfekti Neujahrsüberraschig, hets für mich userem heitere Himmel gheisse, ich müesse wider zügle. Ich hans zersch ned wirklich verstande, s denn müesse akzeptiere. Generell rüehrt die ganz Sach am Schluss und das fehlende Vertraue es sehr schlechts Liecht uf die Zit mit de Family Shoreman.
Am 3. Januar bin ich also wider züglet zu de Family Tustin. Sie lebed schön ide Stadt, so be ich in Laufdistanz zu de Downtown, was ja recht guet isch. Generell han ichs da mit Family au recht guet, sie sind au luschtig und nett. Es git so es paar Problem, allerdings denk ich im Moment, dass mer die us de Welt schaffe chönd und die Zit da schön wird.
Generell isch Kanada eifach so geil! Meh cha sege, dass de Stereotyp, dass sie die nettiste Lüüt uf de Welt sind, stimmt. D Asammlig vo nette Lüüt isch da wirklich unglaublich und die meischte Lüüt sind so offe und meh hed wirklich keis Problem in es Gspröch z cho, au wem er d Persone ned kennt. Ich muess sege, dass d Lüüt im Verglich zu da doch eher stiief und ignorant sind. Ich weiss jetzt scho, dass ich Kanada nach em Uustusch ganz sicher ned eifach so wird vergesse und hoffentlich au meh als einisch wieder zrug chume.
S kanadischste Ding wür ich sege, isch chli komisch, aber isch ganz sicher Tim Hortons. Tim Hortons isch eigentlich en Starbucks, aber vill billiger und viiiiiill besser. Tim Hortons Cup findet mer wirklich überall, ob Schuel, Ishockeymatch oder Skifahre. Ich selber han mich scho mega dra gwöhnt für en lengeri Fahrt sicher ei mal bem Tim Hortons Drive-trough azhalte und sich en heissi Schoggi z hole. Und denn gits au Timbits, so en Snack, eifach s beschte für zwüschedüre! Ich weiss wirklich no ned wie ich mir Tim Hortons wird abgwöhne :-(. Wahrschinlich wird ich mier au no churz vorem Abflug en Tim Hortons Extra Large Hot Chocolate hohle, nur ums no es letscht mal z gnüsse.
50% verbi, 50% to go und ich freu mich druf!
Chlises Update sit em letzte Post: Alltag isch wider ikehrt. Wie gseid gits es paar chlini Problem, aber nüt devo isch wirklich schlimm! Momentan han ich chli lenger frei, weg ich Abschlussprüefige ned muess schriebe. Am nechste Mendig ghads mit em 2. Semester witer. Ich han Fotografie, Gym, Fitness und Französisch als Fächer und ich hoffe, glaube, weiss, dass es recht eifachs Semester wird, aber was söll ich schwirigi Fächer neh, wenn sich doch eigentlich eh niemer für mini Note bzw. die gwählte Fächer interessiert.
Ich plane au gli freiwillig für es Tierheim afo z schaffe, weg ich chli meh Freizitbeschäftigung bruche und sich um Chatze kümmere, tönt doch guet. Generell cha mer da leider im Winter ned vill meh mache, als Skifahre und das chan ich generell wege fehlendem Pass und Usrüstig nur sehr beschränkt mache, wegs schnell is Geld ghad.
Die letschte wuche hemmer au chli meh Schnee und chälteri Temperature gha, es isch für mich meh kanadische Winter gsi als bisher. Nur als es Bispiel:

Am nechste Morge isches sogar -24 Grad gsi und ich bin natürlich id Schuel gloffe.

Zahnpasta-Magie, Festtäg und erneute Familiewechsel

So, das mal wider chli gliner! Das mal isch aber au meh passiert idere churze Zit, als ide zwei Mönat davor.

Zerscht muess ich no erwähne, dass mini Zahnpasta no emmer ned leer isch und das trotz regelmässigem Zähputze. Ich glaub Elmex hed da irgendwie chli Magie ibaut, dass mer emmer no meh Zahpasta findet, mer gnueg fest probiert.
Und jetzt mal chronologisch was sit mim letschte Iitrag so passiert isch. Wiehnachte isch ned schlecht gsi, wenn au andersch als ich mier gwöhnt bin. Am Heiligabig wird nur eis Gschenkli uspackt und das isch traditionell es Pyjama... All andere Gschenk mitsamt Strumpf werdet am Wiehnachtsmorge uspackt. Im Strumpf sind villi chlini sache wie zum Bispiel en Rüggechratzer (eis vo de beschte Wiehnachtsgschenk ever!) und Süessigkeite und so.
Wie dihei isches a Wiehnachte au so, dass mer sich mit de Familie trifft und weg ich ja de Uustuschschüeler bin, bin ich natürlich ah jedes Familietreffe mitgange. Zwüsche Wiehnachte und Neujahr isch de für zwei, drü Täg wieder chli normalers Lebe gsi.
Denn simmer au no im "grösste Skigebiet vo Ontario" go Skifahre, aber für die meiste Schwiizer isch das eifach en Witz. Skilift uffe, abfahre, astaht, glichi Skilift uffe, abfahre... Und de priis isch de au no recht stolz für so es chlises Skigebiet.
A Silvester hemmer fein gesse und denn de Countdown vom Times Square im TV gluegt und recht gli nach Mitternacht hend sich de au scho die meischte is Bett verzoge.
Am 1. Januar heds für mich de au scho die erscht grösser Überraschig vom neue Jahr geh. Nachdem all Gäst gange sind und ich mich zrug i mis Zimmer verzoge han für chli Rueh, isch d Gastmuetter inecho und hed zämefassend gseid, dass ich am Donnschtig zügle muess, weg sie "too busy" für s Hoste sind. Ich han zersch gar ned gwüsst wie reagiere, has zerscht gar ned realisiert. Churz später isch mer de bewusst worde, was das heisst und da hend mer de meh oder weniger all Alarmglogge glütet. Ich han ja glehrt, mer sötti be Problem während em Uustusch nid grad d Eltere informiere, aber wer wür be söttige News andersch reagiere. Am nechste Morge han ich de de Wendy, minere Koordinatorin aglüte und sie hed mer de gseid, dass sie au kei witeri Gründ für mich hed und dass sie alles versuecht hed mit de Gastmuetter z rede und z überzüge, wenigstens versueche allfälligi Problem mit mier und ehre z bespreche. Aber aschinend hed sie das ned welle. Sie het mir de no chli über die neu Gastfamilie verzellt und dass sie mich murn chund go abhole. Ich han denn entschiede, halt mal afange z packe und denn halt mal luege wie d Situations ich entwickelt. Bin de meh oder weniger eifach im Zimmer umeghange, ich han eigentlich kei Kontakt mit de Family welle. Ned be sonere fuule usred und dem aschinend gspillte nette Verhalte... Am nechste Tag hed mich de d Wendy abgholt und während de Fahrt zu de neue Gastfamilie hed sie mer de au verzellt, dass sie nach witere Gründ und Bispiel gfragt hed. D Gastmuetter hed ehre es paar Gründ geh und wemmer die dureliest, denkt mer sich dass ich en absolut schreckliche Uustuschschüeler muess si. "Uninteressiert in Kultur und Lebe in Kanada, ned offe für anderi Meinige und Vorschläg und ich verbringe z vill Zit ah Computer und Skype (!?) z vill mit Family und Kollege". S einzig wo ich denke, dass es villicht wahr si chönnt, isch d Sach mitem Computer. Allerdings muess ich da sege, dass ich die meischt Zit im Wohnzimmer umeghanged bin, aber anstatt stupides amerikanisches TV zluege, han ich halt chli meh Zit am Computer verbracht. Ich ha de Familie scho ganz am afang gseid, dass ich ned so vill TV luege... Skyped han ich während dere Zit praktisch nix und au die andere  Pünkt verstah ich sowit ned. Die jetzig Gastfamilie und au die erscht hed mer gseid, dass sie mich gar nie so erlebt hend und nie so öppis denkt hend. Also bitte fraged ned mich, wenn er wend wüsse, wieso die Familie mich usegrüehrt hed... Ich chönnt nur rate.
Die neu Familie isch aber sowit ganz nett. D Marion isch offiziell mini Gastmuetter. Sie isch en älteri Frau, scho pensioniert, aber recht aktiv in Freiwillige Arbeit und Chile. Ehre einti Sohn und Schwiegertochter lebed im gliche Huus. Sie sind letschte Herbst vo British Columbia zrug uf Ontario zügled. Generell sinds sehr luschtig und sie hend mer au versproche mit mier über Problem z rede, wenns de mal Problem sött ghä. Ich hoffe und glaube sehr fescht, dass ich da ned i die glich komisch Situation inerutsche wie be de letschte Familie. Ich freu mich scho uf die nechste paar Monat da.
Gester hed mich de au d Grippe s erscht mal da verwütscht und so han ich natürlich s feine Znachtesse be de erste Gastfamilie verpasst, aber das wird nahgholt!
Die Wuche han ich au mis Abflugdatum bestätigt becho. Ich flüge am 28.Juni ab und chume am 29. am Morge um 10.45 ah. Aber bis denn isches ja no immer chli meh als d Hälfti vom ganze Uustusch.
Es geb no viiil z verzelle, aber ergendeinisch muess da jetzt au mal wider fertig si...

Alltag, Stress, Merry Christmas und Happy Hanukkah!

Ich melde mich mal wider! Guet zwei Monat han ich mich jetzt ned gmeldet gha, sorry! Das hed verschideni Gründ gha, wie iehr gseh werdet.

Nach em Bikerenne, isch s Lebe Alltag (oder au Langwillig) wurde. Jede Tag id Schuel, Wucheend diheime umeghanged, is Kino oder susch öppis gmacht. S Wetter isch nie recht guet gsi, und so heds ne meh Bike oder so gäh. Im November han ich de im "Movember"-Club ide Schuel mitgmacht. Ab de Mitti vom November han ich nümm chönne in Spiegel luege.
Endi November isch de s Lebe wider spannend wurde. Die vorherig Familie hed ja nur für 3-5 Monät zuegstumme. Min erscht  Zügeltermin isch somit de 1. Dezember gsi. Wenn ned denn, denn ersch nach Wiehnachte. Lang Zit han ich nüt ghört, bis am 27. November. D Wendy, min Coordinator, hed mier gschriebe, das en neui Familie interessiert isch, aber gern meh über mich erfahre würd. Also han ich sie am Donnschtig druf, s erscht mal troffe. Ich han grad gmerkt, das die ganz Familie seehr herzlich isch und sicher ned schlechter als die alt. D Familie isch mit em Treffe aschinend au zfrede gsi. Also bin ich am Sunntig, de 2.Dezember umzoge zunere neue Familie. Han aber au gmerkt, dass ich jetzt scho meh als ein Koffer brücht, wenn ich hei gieng. Wie chund das echt use bis Endi jahr?
Wie isch die neu Familie? Es isch en Familie mit vier Chind. Zwei devo sind allerdings älter und scho uszoge. Die andere beide sind d Lauren, 16i, und de Gastbrüeder, Michael, 14i. Beid gönd aber ned a mini schuel. D Familie hend zwei Hünd, beides Labrador Retriever. Sind zwei Girls, heissed Cindy Lu und Sally. D Cindy Lu isch 7, d Sally 2 Jahr alt. D Familie lebt da in Stayner imene Huus. Sie hend au es Cottage im Killarney Provincial Park. Det ehne chund mer nur mit Boot oder mit em Skimobil. Freu mich scho, wemmer s erscht mal für es Weekend det ehne gönd!
D Familie isch ganz wild nach Wiehnachte und wo ich acho bin, hends scho die ganz Dekoration ufgstellt gha und de künstlich Baum isch au scho gstande. De richtig Baum sinds de met mer grad go ichaufe und isch denn au ufgstellt worde. Ich weiss ned, aber irgendwie isch mini Freud uf Wiehnachte weg dem au irgendwie chli dämpft, es isch eifach chli z früeh gsi.
Letscht wucheend isch de öppis grosses agstande. Wo ich am 2te acho bin, heds gheisse, ich gieng anes Konzert. Hans zersch ned so chönne glaube, aber zwei wuche später, simmer am morge richtig Toronto losgfahre. De Tag dure bin ich mit de Lauren und ihrem Fründ dur Toronto glofe und hend gshopped, am Abig simmer de as Konzert vo Tokio Police Club, Hollerado und Topanga. Es isch scho recht geil gsi, aber uf en Art hed de Tag chönne besser si. Mer hend all chli kränklet und am Abig simmer de all chli müed gsi fürs Konzert. Aber schlussendlich heds mer doch scho gfalle, vorallem Hollerado isch ganz geil gsi! Und denn han ich au no Wiehnachtsguetzli und en Adventskalender becho :). Danke Danke Danke Danke vell mal! Das hed mer de doch no chli Wiehnachtsfeeling geh.
Ide letschte Wuche han ich extrem vill für d Schuel ztuegah. D Lehrer hend aschinend gmerkt, dass nach Wiehnachte nur no 2 Wuche Schuel sind bis zu de Prüefige. Zum Glück muess ich Prüefige ned schriebe :P.
Generell gfallts mer da in Kanada emmer no sehr! D Uustusch isch zwar generell ned so wie erwartet (weiss ergendwie au ned gnau wie ich mier das vorgstellt han), s isch irgendwie zu normals Lebe, aber das isch ned schlecht! Ich bin sehr froh, dass ich jetzt en anderi Family han, wo ich die ganz Zit cha bliebe und wo zumindest so guet wie die ander Familie isch. Heiweh han ich da recht selte und wenn denn isch es ned so, dass ich grad hei wott, es isch sogar uf en Art guet das Heiweh. Es lahd mich erinnere ah das wo ich vermisse und nach chli Heiweh gahds mer emmer besser. Und mengisch isch s Heiweh au chli lächerlich. Hüt zum Bispiil isch d Zahnpasta nach guet zwei Monat drücke und presse, z End gange. Das hed mer doch grad chli Heiweh geh, das ich jetzt uf en "kanadischi" Zahnpasta umstiege muess und nümm be minere gliebte Elmex chan blibe :(. Es sind die chline Sache, wo ich glaub am meiste vermisse und d Zahnpasta isch halt bis jetzt immer no es chlises Stück dihei gsi. Und Musig wo ich generell irgendwie nie glosed han, so wie "American Pie" vom Don McLean, erinnered mich seeehr a dihei. Fraged mich ned wieso, aber es isch eifach so.
Ich han mich jetzt au meh oder weniger as Lebe da gwöhnt. Es isch ned grossartig andersch und es isch gwöhnigsbedürftig. Mengisch han ich au s Gfühl sie hend da chli de gsund Menscheverstand verlore (das chan ich jetzt au ned uf English wiederhole :P). Zum Bispiel isch es de Schüeler a de Schuel da ned erlaubt, ide chalte Usseschuelzimmer en Jagge oder Puli z träge, au wenn d Heizig ned lauft bzw. nie gloffe isch. S einzig wo eus erlaubt isch z träge, isch de Uniform Pulli, aber de ged ned warm. Und de fragt sich d Schuel wieso so villi Schüeler chrank sind. Oder de Schuel Bus hed ussedrah alles was er für Sicherheit brucht, sogar extra Stopschilder, wenner ahaltet. Aber im Bus heds kei Gürt oder suschtigi Sicherheitsvorcherige, nur weg die chönnted brönne, wenn de Bus wür brönne. Es sind eifach so sache, wo i de Schwiiiz irgendwie selbstverständlich sind, wo da dur Regle igschränked werdet.
Generell d Schuele sind da sozialer. D Schuel isch da für die meischte Lüüt die ganz Freizit. D Sportteam sind sehr beliebt und das isch d Freizitbeschäftigung. Und generell sind da vill Lehrer au lockerer und aktiver als ide Schuel. Und generell die ganz Schuel isch ned so "stiief" und "prüüd" wie ide Schwiiz. Am Fritig isch da Abschluss vor Wiehnachte gsi. Ned de Talentshow heds au de "Teachers Skit" geh. Das isch so en Art TV-Show gmacht vo de Lehrer. Das Jahr hends "Gangnam Style"(http://www.youtube.com/watch?v=9bZkp7q19f0) parodiert. Und selbst die beide Rektor hend mitgmacht, was ide Schuel komplett unmöglich wär. Nur scho d Vorstellig, das eusi Rektor und Lehrer de Gangnam Style Tanz würed mache, isch lächerlich.
Ich bin mer ganz sicher, ich han no tuusig Sache vergesse z erwähne, aber chan ja emmer mal weder schribe. Ich ha hoffentlich mal echli Zit zum schriebe!