Ich melde mich mal wider! Guet zwei Monat han ich mich jetzt ned gmeldet gha, sorry! Das hed verschideni Gründ gha, wie iehr gseh werdet.
Nach em Bikerenne, isch s Lebe Alltag (oder au Langwillig) wurde. Jede Tag id Schuel, Wucheend diheime umeghanged, is Kino oder susch öppis gmacht. S Wetter isch nie recht guet gsi, und so heds ne meh Bike oder so gäh. Im November han ich de im "Movember"-Club ide Schuel mitgmacht. Ab de Mitti vom November han ich nümm chönne in Spiegel luege.
Endi November isch de s Lebe wider spannend wurde. Die vorherig Familie hed ja nur für 3-5 Monät zuegstumme. Min erscht Zügeltermin isch somit de 1. Dezember gsi. Wenn ned denn, denn ersch nach Wiehnachte. Lang Zit han ich nüt ghört, bis am 27. November. D Wendy, min Coordinator, hed mier gschriebe, das en neui Familie interessiert isch, aber gern meh über mich erfahre würd. Also han ich sie am Donnschtig druf, s erscht mal troffe. Ich han grad gmerkt, das die ganz Familie seehr herzlich isch und sicher ned schlechter als die alt. D Familie isch mit em Treffe aschinend au zfrede gsi. Also bin ich am Sunntig, de 2.Dezember umzoge zunere neue Familie. Han aber au gmerkt, dass ich jetzt scho meh als ein Koffer brücht, wenn ich hei gieng. Wie chund das echt use bis Endi jahr?
Wie isch die neu Familie? Es isch en Familie mit vier Chind. Zwei devo sind allerdings älter und scho uszoge. Die andere beide sind d Lauren, 16i, und de Gastbrüeder, Michael, 14i. Beid gönd aber ned a mini schuel. D Familie hend zwei Hünd, beides Labrador Retriever. Sind zwei Girls, heissed Cindy Lu und Sally. D Cindy Lu isch 7, d Sally 2 Jahr alt. D Familie lebt da in Stayner imene Huus. Sie hend au es Cottage im Killarney Provincial Park. Det ehne chund mer nur mit Boot oder mit em Skimobil. Freu mich scho, wemmer s erscht mal für es Weekend det ehne gönd!
D Familie isch ganz wild nach Wiehnachte und wo ich acho bin, hends scho die ganz Dekoration ufgstellt gha und de künstlich Baum isch au scho gstande. De richtig Baum sinds de met mer grad go ichaufe und isch denn au ufgstellt worde. Ich weiss ned, aber irgendwie isch mini Freud uf Wiehnachte weg dem au irgendwie chli dämpft, es isch eifach chli z früeh gsi.
Letscht wucheend isch de öppis grosses agstande. Wo ich am 2te acho bin, heds gheisse, ich gieng anes Konzert. Hans zersch ned so chönne glaube, aber zwei wuche später, simmer am morge richtig Toronto losgfahre. De Tag dure bin ich mit de Lauren und ihrem Fründ dur Toronto glofe und hend gshopped, am Abig simmer de as Konzert vo Tokio Police Club, Hollerado und Topanga. Es isch scho recht geil gsi, aber uf en Art hed de Tag chönne besser si. Mer hend all chli kränklet und am Abig simmer de all chli müed gsi fürs Konzert. Aber schlussendlich heds mer doch scho gfalle, vorallem Hollerado isch ganz geil gsi! Und denn han ich au no Wiehnachtsguetzli und en Adventskalender becho :). Danke Danke Danke Danke vell mal! Das hed mer de doch no chli Wiehnachtsfeeling geh.
Ide letschte Wuche han ich extrem vill für d Schuel ztuegah. D Lehrer hend aschinend gmerkt, dass nach Wiehnachte nur no 2 Wuche Schuel sind bis zu de Prüefige. Zum Glück muess ich Prüefige ned schriebe :P.
Generell gfallts mer da in Kanada emmer no sehr! D Uustusch isch zwar generell ned so wie erwartet (weiss ergendwie au ned gnau wie ich mier das vorgstellt han), s isch irgendwie zu normals Lebe, aber das isch ned schlecht! Ich bin sehr froh, dass ich jetzt en anderi Family han, wo ich die ganz Zit cha bliebe und wo zumindest so guet wie die ander Familie isch. Heiweh han ich da recht selte und wenn denn isch es ned so, dass ich grad hei wott, es isch sogar uf en Art guet das Heiweh. Es lahd mich erinnere ah das wo ich vermisse und nach chli Heiweh gahds mer emmer besser. Und mengisch isch s Heiweh au chli lächerlich. Hüt zum Bispiil isch d Zahnpasta nach guet zwei Monat drücke und presse, z End gange. Das hed mer doch grad chli Heiweh geh, das ich jetzt uf en "kanadischi" Zahnpasta umstiege muess und nümm be minere gliebte Elmex chan blibe :(. Es sind die chline Sache, wo ich glaub am meiste vermisse und d Zahnpasta isch halt bis jetzt immer no es chlises Stück dihei gsi. Und Musig wo ich generell irgendwie nie glosed han, so wie "American Pie" vom Don McLean, erinnered mich seeehr a dihei. Fraged mich ned wieso, aber es isch eifach so.
Ich han mich jetzt au meh oder weniger as Lebe da gwöhnt. Es isch ned grossartig andersch und es isch gwöhnigsbedürftig. Mengisch han ich au s Gfühl sie hend da chli de gsund Menscheverstand verlore (das chan ich jetzt au ned uf English wiederhole :P). Zum Bispiel isch es de Schüeler a de Schuel da ned erlaubt, ide chalte Usseschuelzimmer en Jagge oder Puli z träge, au wenn d Heizig ned lauft bzw. nie gloffe isch. S einzig wo eus erlaubt isch z träge, isch de Uniform Pulli, aber de ged ned warm. Und de fragt sich d Schuel wieso so villi Schüeler chrank sind. Oder de Schuel Bus hed ussedrah alles was er für Sicherheit brucht, sogar extra Stopschilder, wenner ahaltet. Aber im Bus heds kei Gürt oder suschtigi Sicherheitsvorcherige, nur weg die chönnted brönne, wenn de Bus wür brönne. Es sind eifach so sache, wo i de Schwiiiz irgendwie selbstverständlich sind, wo da dur Regle igschränked werdet.
Generell d Schuele sind da sozialer. D Schuel isch da für die meischte Lüüt die ganz Freizit. D Sportteam sind sehr beliebt und das isch d Freizitbeschäftigung. Und generell sind da vill Lehrer au lockerer und aktiver als ide Schuel. Und generell die ganz Schuel isch ned so "stiief" und "prüüd" wie ide Schwiiz. Am Fritig isch da Abschluss vor Wiehnachte gsi. Ned de Talentshow heds au de "Teachers Skit" geh. Das isch so en Art TV-Show gmacht vo de Lehrer. Das Jahr hends "Gangnam Style"(http://www.youtube.com/watch?v=9bZkp7q19f0) parodiert. Und selbst die beide Rektor hend mitgmacht, was ide Schuel komplett unmöglich wär. Nur scho d Vorstellig, das eusi Rektor und Lehrer de Gangnam Style Tanz würed mache, isch lächerlich.
Ich bin mer ganz sicher, ich han no tuusig Sache vergesse z erwähne, aber chan ja emmer mal weder schribe. Ich ha hoffentlich mal echli Zit zum schriebe!
Keine Kommentare:
Kommentar veröffentlichen