Jetzt bin ich also da in Kanada acho, sicher und mit allem Gepäck be de Gastfamilie. Momentan isch ziemlich alles sehr guet und ich bin sehr ufgregt uf de mornig erschti Schueltag.
Zersch mal: Ich werd mich da im Blog immer wieder mal melde, aber halt ned z vill, weg ich au ned z vill am PC sitze wott. Am Afang schrib ich jetzt no uf Schwitzerdütsch, spöter denn uf Englisch. Wenn er jetzt oder spöter öppis ned verstönd, fraget doch über Email oder Facebook.
Gschicht mal ganz vo Afang ah:
De meischte vo euch han ich gseid gha, dass ich zunere Familie chume mit zwei chline Chind und Eltere mit 25 Jahr Altersuntschied. Das han ich uf jede Fall au denkt gha. Bis am Sunntigabig, de 26.August, also guet 3 Täg vor Abreis. A dem Abig han ich de Gastfamilie aglüte gha, und denn erfahre, dass ich aschienend ned de zuekünftig Exchange-Student vo dere Familie bin. Ich ha zersch gmeint, ich het ned richtig verstande, aber sie hends mehrmals wiederholt und bestätigt. Ich han denn minere Organisation, into, aglüte und die hend zersch mal au gschockt reagiert. Sie hend also au nüt devo gwüsst gha. Am Mendignamitag hends mer de weder aglüte und gseid, dass es tatsächlich so isch, dass ich ned i die Gastfamilie chume, sondern in en anderi. Am Abig han ich denn de neue Gastfamilie aglüte und das Mal ischs Gspröch so wie erwartet gloffe und es hed kei Überraschig meh ghä.
Am nöchste Morge han ich denn no d Informatione über die neu Gastfamilie becho, also d Jobs vo de Eltere, Geburtstäg etc. Det han ich gseh, min Gastvater isch PILOT! Ich has zerscht gar ned welle glaube, so es Glück, aber es isch also wirklich so :).
Am Mittwuchmorge bin ich de mit de ganze Familie an Flughafe gfahre, icheckt mit de andere Uustuschschüeler und denn isch de schlussendlich d Verabschiedig agstande. Es isch wirklich recht truurig gsi, und jetzt han ich doch grad weder chli Heiweh wenn ich ah das denke :(.
De Flug selber isch ned wirklich guet gsi. Han en Gangplatz gha, was ich de schlimmst vo allne Mängel finde. Zudem het de Chopfhörer en blöde Wackelkontakt gha, de Sitz isch dreckig gsi (rechtig dreckig!) und s Esse isch au ned wirklich fein gsi. Ich han ned mal d Charte vom Flug chönne aluege, weg das blöde Unterhaltigssystem gstreikt hed. Zum Glück han ich wenigstens en netti Sitznachbarin gha und ich bin ja schlussendlich sicher acho, was wichtigste gsi isch.
Nach de Akunft hemmer zersch mal recht lang müesse warte, bis all dur d Immigration dure cho sind. Und denn hemmer au no müesse warte, bis die Norwegisch Reisegruppe zu eus gstosse isch. Denn simmer zum Hostel gfahre, hend ned wirklich feini Pizza zum Znacht gesse und sind denn, all recht müed, go schlafe.
Am nächste Tag simmer zu de Niagara Fäll gfahre und hend sie gnauer agluegt. Also dur Tunnel hender de eigentlich Wasserfall und au mit em Boot ganz nöch dra äne. Es isch wirklich seehr iidrücklich gsi und alles in allem isches en mega coole Tag gsi. Am Abig simmer denn is Hard Rock Cafe go esse. Ich han, natürlich, en Hard Rock Cafe typische Burger gha.
Am zweite Tag simmer go Sightseeing mache in Toronto. Am Morge hemmer en Bootstour rund um d "Islands of Toronto" gha. Ned wirklich spannend, aber defür recht schön! Denn sind mer uf de CN-Tower ufe. Das isch wirklich sehr idrücklich gsi, mit de Uusicht und vorallem au de Glass Floor. Am Namitag sind mer mit em Sightseeing-Bus in Toronto umegfahre, was aber ned gmüetlich oder interessant gsi isch, wegs eifach vill vill z heiss gsi isch (öppe 32° im Schatte). Am Schluss hemmer denn no chli Frisbee imene Park gspillt. Amüsant isch gsi, dass jedes Mal wenn en U-Bahn une dure gfahre isch, de Bode vibriert hed. Am Abig simmer imene Restaurant go esse, wo, glaub ich, bekannt für sis Bier isch. Was für en Ironie, wenn doch niemer vo eus hed döffe es Bier bstelle :D.
Am nächste Morge bin ich vo de Wendy, en Frau vo kanadische Organisation abgholt worde und sie hed mich direkt zu de Gastfamilie gfahre. Unterwägs hemmer es spannends Gspröch gha, über was sie scho für Schüeler gha hed und was die zum Teil für kuriosi Sache agstellt hend. En japanische Schüelerin hed zum Bispiel mal welle d Katze vo de Gastfamilie vergifte, weg sie d Gastfamilie ned möge hed.
Be de Gastfamilie acho, han ich zersch mal denkt, WOW!, das huus isch riiiiiesig! Und es isch, für Schwiizer Verhältnis au wirklich riesig. Wie ich spöter usegfunde han, isches für kanadische Verhältnis nur relativ gross.
Vo de Gastfamilie bin ich guet ufgnoh worde. Ich han da es schöns Zimmer, d Gastfamilie isch nett, und s Lebe unterscheidet sich ned z gross vo dem ide Schwiiz.
Mer hend denn grad en Tour rund um Collingwood gmacht, ich han gseh wo ich id Schuel gah, wo mer sis Züg ichauft und ich bin au scho go bade im alte Hafebecki.
Am nächste Tag simmer denn uf Bsuech gfahre zu Fründe vo de Familie. Mier sind NUR rund 2 1/2 Stund gfahre. Aschinend normali Verhältnis für Kanadier :D. Zäme mit dene Fründe bin ich denn au s erscht Mal go bike und hans aschienend au recht guet gmacht, zumindest het das mini Gastmuetter, d Jillian gmeint. Am Abig isch de gmüetlichs Umesitze und Esse agseid gsi. Seehr spat am Abig sind mer denn wieder dihei acho und meh oder weniger direkt is Bett.
De hüttig Tag isch denn gmüetlicher gsi, als de letscht. Zersch mal usgschlafe und denn bin ich weder mit go Bike. Es isch en recht vill schwirigere Track gsi als am Sunntig, aber es isch au entsprechend meh en Heruusforderig gsi. Am Abig hemmer denn es Happy-Birthday-Dinner füer d Muetter gesse. Sie werd 50i murn.
Soo, ich hoffe, ich han ned z vill gschrebe, es hed halt vill z brichte ghä. Morn isch min erschte Schueltag a de High School. Bin dementsprechend au scho recht uufgregt und ich hoffe, ich schlafe guet :).
Ich han das mal no kei Bilder hinzuegfüegt, weg ich alli mitem Handy mache und s chli müehsam isch, die uf de PC z tue. Ich werd sicher mal alli Bilder da hinzuefüege und entsprechend beschriebe.
Ich verzieh mich jetzt de grad is Bett, wott fit sie morn.
Good Night from Canada
Keine Kommentare:
Kommentar veröffentlichen