Halbwegs fertig - so churz, doch so lang

Da isch d Hälfti scho ume!
Hüt bzw. gester sinds genau 5 Monät sit mim Abflug und de Zuefall wotts dass es au no genau 5 Monät sind, bis ich wider dihei lande. Also mal Zit s Halbiziit-Fazit z zieh.
Wo ich vor 5 Monät abfloge bin, het ich nie erwartet, dass de Uustusch so isch, wie sich usegstellt hed. Ich weiss allerdings au ned wirklich, wie ich mier das vorgstellt han, also seid das ned vill us. Generell chamer sege, dass es unvergesslich isch, aber doch vill meh Alltag als mer sichs villicht denkt.
Die erschte drü Monät han ich mit de Family Foxcroft zemeglebt. Sie sind wirklich all mega nett gsi und mier hend eus recht guet verstande. Leider isch es aber nach drü Monat de besser Weg gsi wegzzügle, weg d Foxcrofts sehr aktivi Skier imene private Skiclub sind, und Skipass und Equipment leider vill zu tüür gsi wär.
Afang Dezember hets de gheisse zügle zu de Family Shoreman. D Ziit dete isch au recht schön gsi, Wiehnachte und Neujahr han ich sehr chönne gnüsse und ich has mit de Family eigentlich immer recht guet. Leider isches vo ehrere Site halt ned so gsi, ich weiss no emmer ned wieso. Am 1. Januar, die perfekti Neujahrsüberraschig, hets für mich userem heitere Himmel gheisse, ich müesse wider zügle. Ich hans zersch ned wirklich verstande, s denn müesse akzeptiere. Generell rüehrt die ganz Sach am Schluss und das fehlende Vertraue es sehr schlechts Liecht uf die Zit mit de Family Shoreman.
Am 3. Januar bin ich also wider züglet zu de Family Tustin. Sie lebed schön ide Stadt, so be ich in Laufdistanz zu de Downtown, was ja recht guet isch. Generell han ichs da mit Family au recht guet, sie sind au luschtig und nett. Es git so es paar Problem, allerdings denk ich im Moment, dass mer die us de Welt schaffe chönd und die Zit da schön wird.
Generell isch Kanada eifach so geil! Meh cha sege, dass de Stereotyp, dass sie die nettiste Lüüt uf de Welt sind, stimmt. D Asammlig vo nette Lüüt isch da wirklich unglaublich und die meischte Lüüt sind so offe und meh hed wirklich keis Problem in es Gspröch z cho, au wem er d Persone ned kennt. Ich muess sege, dass d Lüüt im Verglich zu da doch eher stiief und ignorant sind. Ich weiss jetzt scho, dass ich Kanada nach em Uustusch ganz sicher ned eifach so wird vergesse und hoffentlich au meh als einisch wieder zrug chume.
S kanadischste Ding wür ich sege, isch chli komisch, aber isch ganz sicher Tim Hortons. Tim Hortons isch eigentlich en Starbucks, aber vill billiger und viiiiiill besser. Tim Hortons Cup findet mer wirklich überall, ob Schuel, Ishockeymatch oder Skifahre. Ich selber han mich scho mega dra gwöhnt für en lengeri Fahrt sicher ei mal bem Tim Hortons Drive-trough azhalte und sich en heissi Schoggi z hole. Und denn gits au Timbits, so en Snack, eifach s beschte für zwüschedüre! Ich weiss wirklich no ned wie ich mir Tim Hortons wird abgwöhne :-(. Wahrschinlich wird ich mier au no churz vorem Abflug en Tim Hortons Extra Large Hot Chocolate hohle, nur ums no es letscht mal z gnüsse.
50% verbi, 50% to go und ich freu mich druf!
Chlises Update sit em letzte Post: Alltag isch wider ikehrt. Wie gseid gits es paar chlini Problem, aber nüt devo isch wirklich schlimm! Momentan han ich chli lenger frei, weg ich Abschlussprüefige ned muess schriebe. Am nechste Mendig ghads mit em 2. Semester witer. Ich han Fotografie, Gym, Fitness und Französisch als Fächer und ich hoffe, glaube, weiss, dass es recht eifachs Semester wird, aber was söll ich schwirigi Fächer neh, wenn sich doch eigentlich eh niemer für mini Note bzw. die gwählte Fächer interessiert.
Ich plane au gli freiwillig für es Tierheim afo z schaffe, weg ich chli meh Freizitbeschäftigung bruche und sich um Chatze kümmere, tönt doch guet. Generell cha mer da leider im Winter ned vill meh mache, als Skifahre und das chan ich generell wege fehlendem Pass und Usrüstig nur sehr beschränkt mache, wegs schnell is Geld ghad.
Die letschte wuche hemmer au chli meh Schnee und chälteri Temperature gha, es isch für mich meh kanadische Winter gsi als bisher. Nur als es Bispiel:

Am nechste Morge isches sogar -24 Grad gsi und ich bin natürlich id Schuel gloffe.

Zahnpasta-Magie, Festtäg und erneute Familiewechsel

So, das mal wider chli gliner! Das mal isch aber au meh passiert idere churze Zit, als ide zwei Mönat davor.

Zerscht muess ich no erwähne, dass mini Zahnpasta no emmer ned leer isch und das trotz regelmässigem Zähputze. Ich glaub Elmex hed da irgendwie chli Magie ibaut, dass mer emmer no meh Zahpasta findet, mer gnueg fest probiert.
Und jetzt mal chronologisch was sit mim letschte Iitrag so passiert isch. Wiehnachte isch ned schlecht gsi, wenn au andersch als ich mier gwöhnt bin. Am Heiligabig wird nur eis Gschenkli uspackt und das isch traditionell es Pyjama... All andere Gschenk mitsamt Strumpf werdet am Wiehnachtsmorge uspackt. Im Strumpf sind villi chlini sache wie zum Bispiel en Rüggechratzer (eis vo de beschte Wiehnachtsgschenk ever!) und Süessigkeite und so.
Wie dihei isches a Wiehnachte au so, dass mer sich mit de Familie trifft und weg ich ja de Uustuschschüeler bin, bin ich natürlich ah jedes Familietreffe mitgange. Zwüsche Wiehnachte und Neujahr isch de für zwei, drü Täg wieder chli normalers Lebe gsi.
Denn simmer au no im "grösste Skigebiet vo Ontario" go Skifahre, aber für die meiste Schwiizer isch das eifach en Witz. Skilift uffe, abfahre, astaht, glichi Skilift uffe, abfahre... Und de priis isch de au no recht stolz für so es chlises Skigebiet.
A Silvester hemmer fein gesse und denn de Countdown vom Times Square im TV gluegt und recht gli nach Mitternacht hend sich de au scho die meischte is Bett verzoge.
Am 1. Januar heds für mich de au scho die erscht grösser Überraschig vom neue Jahr geh. Nachdem all Gäst gange sind und ich mich zrug i mis Zimmer verzoge han für chli Rueh, isch d Gastmuetter inecho und hed zämefassend gseid, dass ich am Donnschtig zügle muess, weg sie "too busy" für s Hoste sind. Ich han zersch gar ned gwüsst wie reagiere, has zerscht gar ned realisiert. Churz später isch mer de bewusst worde, was das heisst und da hend mer de meh oder weniger all Alarmglogge glütet. Ich han ja glehrt, mer sötti be Problem während em Uustusch nid grad d Eltere informiere, aber wer wür be söttige News andersch reagiere. Am nechste Morge han ich de de Wendy, minere Koordinatorin aglüte und sie hed mer de gseid, dass sie au kei witeri Gründ für mich hed und dass sie alles versuecht hed mit de Gastmuetter z rede und z überzüge, wenigstens versueche allfälligi Problem mit mier und ehre z bespreche. Aber aschinend hed sie das ned welle. Sie het mir de no chli über die neu Gastfamilie verzellt und dass sie mich murn chund go abhole. Ich han denn entschiede, halt mal afange z packe und denn halt mal luege wie d Situations ich entwickelt. Bin de meh oder weniger eifach im Zimmer umeghange, ich han eigentlich kei Kontakt mit de Family welle. Ned be sonere fuule usred und dem aschinend gspillte nette Verhalte... Am nechste Tag hed mich de d Wendy abgholt und während de Fahrt zu de neue Gastfamilie hed sie mer de au verzellt, dass sie nach witere Gründ und Bispiel gfragt hed. D Gastmuetter hed ehre es paar Gründ geh und wemmer die dureliest, denkt mer sich dass ich en absolut schreckliche Uustuschschüeler muess si. "Uninteressiert in Kultur und Lebe in Kanada, ned offe für anderi Meinige und Vorschläg und ich verbringe z vill Zit ah Computer und Skype (!?) z vill mit Family und Kollege". S einzig wo ich denke, dass es villicht wahr si chönnt, isch d Sach mitem Computer. Allerdings muess ich da sege, dass ich die meischt Zit im Wohnzimmer umeghanged bin, aber anstatt stupides amerikanisches TV zluege, han ich halt chli meh Zit am Computer verbracht. Ich ha de Familie scho ganz am afang gseid, dass ich ned so vill TV luege... Skyped han ich während dere Zit praktisch nix und au die andere  Pünkt verstah ich sowit ned. Die jetzig Gastfamilie und au die erscht hed mer gseid, dass sie mich gar nie so erlebt hend und nie so öppis denkt hend. Also bitte fraged ned mich, wenn er wend wüsse, wieso die Familie mich usegrüehrt hed... Ich chönnt nur rate.
Die neu Familie isch aber sowit ganz nett. D Marion isch offiziell mini Gastmuetter. Sie isch en älteri Frau, scho pensioniert, aber recht aktiv in Freiwillige Arbeit und Chile. Ehre einti Sohn und Schwiegertochter lebed im gliche Huus. Sie sind letschte Herbst vo British Columbia zrug uf Ontario zügled. Generell sinds sehr luschtig und sie hend mer au versproche mit mier über Problem z rede, wenns de mal Problem sött ghä. Ich hoffe und glaube sehr fescht, dass ich da ned i die glich komisch Situation inerutsche wie be de letschte Familie. Ich freu mich scho uf die nechste paar Monat da.
Gester hed mich de au d Grippe s erscht mal da verwütscht und so han ich natürlich s feine Znachtesse be de erste Gastfamilie verpasst, aber das wird nahgholt!
Die Wuche han ich au mis Abflugdatum bestätigt becho. Ich flüge am 28.Juni ab und chume am 29. am Morge um 10.45 ah. Aber bis denn isches ja no immer chli meh als d Hälfti vom ganze Uustusch.
Es geb no viiil z verzelle, aber ergendeinisch muess da jetzt au mal wider fertig si...

Alltag, Stress, Merry Christmas und Happy Hanukkah!

Ich melde mich mal wider! Guet zwei Monat han ich mich jetzt ned gmeldet gha, sorry! Das hed verschideni Gründ gha, wie iehr gseh werdet.

Nach em Bikerenne, isch s Lebe Alltag (oder au Langwillig) wurde. Jede Tag id Schuel, Wucheend diheime umeghanged, is Kino oder susch öppis gmacht. S Wetter isch nie recht guet gsi, und so heds ne meh Bike oder so gäh. Im November han ich de im "Movember"-Club ide Schuel mitgmacht. Ab de Mitti vom November han ich nümm chönne in Spiegel luege.
Endi November isch de s Lebe wider spannend wurde. Die vorherig Familie hed ja nur für 3-5 Monät zuegstumme. Min erscht  Zügeltermin isch somit de 1. Dezember gsi. Wenn ned denn, denn ersch nach Wiehnachte. Lang Zit han ich nüt ghört, bis am 27. November. D Wendy, min Coordinator, hed mier gschriebe, das en neui Familie interessiert isch, aber gern meh über mich erfahre würd. Also han ich sie am Donnschtig druf, s erscht mal troffe. Ich han grad gmerkt, das die ganz Familie seehr herzlich isch und sicher ned schlechter als die alt. D Familie isch mit em Treffe aschinend au zfrede gsi. Also bin ich am Sunntig, de 2.Dezember umzoge zunere neue Familie. Han aber au gmerkt, dass ich jetzt scho meh als ein Koffer brücht, wenn ich hei gieng. Wie chund das echt use bis Endi jahr?
Wie isch die neu Familie? Es isch en Familie mit vier Chind. Zwei devo sind allerdings älter und scho uszoge. Die andere beide sind d Lauren, 16i, und de Gastbrüeder, Michael, 14i. Beid gönd aber ned a mini schuel. D Familie hend zwei Hünd, beides Labrador Retriever. Sind zwei Girls, heissed Cindy Lu und Sally. D Cindy Lu isch 7, d Sally 2 Jahr alt. D Familie lebt da in Stayner imene Huus. Sie hend au es Cottage im Killarney Provincial Park. Det ehne chund mer nur mit Boot oder mit em Skimobil. Freu mich scho, wemmer s erscht mal für es Weekend det ehne gönd!
D Familie isch ganz wild nach Wiehnachte und wo ich acho bin, hends scho die ganz Dekoration ufgstellt gha und de künstlich Baum isch au scho gstande. De richtig Baum sinds de met mer grad go ichaufe und isch denn au ufgstellt worde. Ich weiss ned, aber irgendwie isch mini Freud uf Wiehnachte weg dem au irgendwie chli dämpft, es isch eifach chli z früeh gsi.
Letscht wucheend isch de öppis grosses agstande. Wo ich am 2te acho bin, heds gheisse, ich gieng anes Konzert. Hans zersch ned so chönne glaube, aber zwei wuche später, simmer am morge richtig Toronto losgfahre. De Tag dure bin ich mit de Lauren und ihrem Fründ dur Toronto glofe und hend gshopped, am Abig simmer de as Konzert vo Tokio Police Club, Hollerado und Topanga. Es isch scho recht geil gsi, aber uf en Art hed de Tag chönne besser si. Mer hend all chli kränklet und am Abig simmer de all chli müed gsi fürs Konzert. Aber schlussendlich heds mer doch scho gfalle, vorallem Hollerado isch ganz geil gsi! Und denn han ich au no Wiehnachtsguetzli und en Adventskalender becho :). Danke Danke Danke Danke vell mal! Das hed mer de doch no chli Wiehnachtsfeeling geh.
Ide letschte Wuche han ich extrem vill für d Schuel ztuegah. D Lehrer hend aschinend gmerkt, dass nach Wiehnachte nur no 2 Wuche Schuel sind bis zu de Prüefige. Zum Glück muess ich Prüefige ned schriebe :P.
Generell gfallts mer da in Kanada emmer no sehr! D Uustusch isch zwar generell ned so wie erwartet (weiss ergendwie au ned gnau wie ich mier das vorgstellt han), s isch irgendwie zu normals Lebe, aber das isch ned schlecht! Ich bin sehr froh, dass ich jetzt en anderi Family han, wo ich die ganz Zit cha bliebe und wo zumindest so guet wie die ander Familie isch. Heiweh han ich da recht selte und wenn denn isch es ned so, dass ich grad hei wott, es isch sogar uf en Art guet das Heiweh. Es lahd mich erinnere ah das wo ich vermisse und nach chli Heiweh gahds mer emmer besser. Und mengisch isch s Heiweh au chli lächerlich. Hüt zum Bispiil isch d Zahnpasta nach guet zwei Monat drücke und presse, z End gange. Das hed mer doch grad chli Heiweh geh, das ich jetzt uf en "kanadischi" Zahnpasta umstiege muess und nümm be minere gliebte Elmex chan blibe :(. Es sind die chline Sache, wo ich glaub am meiste vermisse und d Zahnpasta isch halt bis jetzt immer no es chlises Stück dihei gsi. Und Musig wo ich generell irgendwie nie glosed han, so wie "American Pie" vom Don McLean, erinnered mich seeehr a dihei. Fraged mich ned wieso, aber es isch eifach so.
Ich han mich jetzt au meh oder weniger as Lebe da gwöhnt. Es isch ned grossartig andersch und es isch gwöhnigsbedürftig. Mengisch han ich au s Gfühl sie hend da chli de gsund Menscheverstand verlore (das chan ich jetzt au ned uf English wiederhole :P). Zum Bispiel isch es de Schüeler a de Schuel da ned erlaubt, ide chalte Usseschuelzimmer en Jagge oder Puli z träge, au wenn d Heizig ned lauft bzw. nie gloffe isch. S einzig wo eus erlaubt isch z träge, isch de Uniform Pulli, aber de ged ned warm. Und de fragt sich d Schuel wieso so villi Schüeler chrank sind. Oder de Schuel Bus hed ussedrah alles was er für Sicherheit brucht, sogar extra Stopschilder, wenner ahaltet. Aber im Bus heds kei Gürt oder suschtigi Sicherheitsvorcherige, nur weg die chönnted brönne, wenn de Bus wür brönne. Es sind eifach so sache, wo i de Schwiiiz irgendwie selbstverständlich sind, wo da dur Regle igschränked werdet.
Generell d Schuele sind da sozialer. D Schuel isch da für die meischte Lüüt die ganz Freizit. D Sportteam sind sehr beliebt und das isch d Freizitbeschäftigung. Und generell sind da vill Lehrer au lockerer und aktiver als ide Schuel. Und generell die ganz Schuel isch ned so "stiief" und "prüüd" wie ide Schwiiz. Am Fritig isch da Abschluss vor Wiehnachte gsi. Ned de Talentshow heds au de "Teachers Skit" geh. Das isch so en Art TV-Show gmacht vo de Lehrer. Das Jahr hends "Gangnam Style"(http://www.youtube.com/watch?v=9bZkp7q19f0) parodiert. Und selbst die beide Rektor hend mitgmacht, was ide Schuel komplett unmöglich wär. Nur scho d Vorstellig, das eusi Rektor und Lehrer de Gangnam Style Tanz würed mache, isch lächerlich.
Ich bin mer ganz sicher, ich han no tuusig Sache vergesse z erwähne, aber chan ja emmer mal weder schribe. Ich ha hoffentlich mal echli Zit zum schriebe!

Erschts Bikerenne & meh oder weniger normals lebe

Es git immer weniger z berichte da. Irgendwie han ich über alles scho brichtet, wo da chli speziell isch. Aber das isch ja ned unbedingt schlecht, wär ja irgendwie ned guet, wenn ich immer wieder Überraschige han. D Schuel isch sowit normal, bes uf dass die viiil meh Huusufgabe han, die defür meistens recht eifach sind. Letscht wucheend han ich mis erschte "richtige" Bikerenne gha. Leider heds s Bike ned ganz so welle wie ich. D Gäng und d Brems hend ned so ganz funktioniert. Aber es isch trotzdem luschtig und vorallem en interessanti neue erfahrig gsi.

Le moi vorem renne. No recht suuber aber scho chli nass.

Für Föteli während em renne, chönder da luege: http://racedayrush.zoomphoto.ca/v5/event_gallery_search.php?frmIndex=445&submit=Search&event=17496&photog=racedayrush

So, git glaub ned meh z brichte, und susch meld ich mich wider

Sorry, no english translation this time.

Saluti!

Melde mich mal wider!
No immer gahds mer ganz guet, chan ned klage! D Schuel isch alltag und mit de Familie han ichs guet. Letscht wuche isch recht blöd gsi. Weg mer mit de Familie s Internetlimit erreicht hend, hend mer euse Verbruuch mösse ischränke. Recht blöd, wemmer wott Kontakt ha mit ere Person.
Letscht wuchenend bin ich im Camp gsi mit andere Uustuschschüeler. S isch recht de Horror gsi! Zäme mit mier sind 10 Japaner und 4 anderi europäische Fraue im Camp gsi. Das hed gheisse, dass ich zäme mit 5 Japaner ide "Cabin" gsi isch. Die hend natürlich immer nur japanisch gredet, wür ich natürlich au mache. S ganze Wucheend isch ned wirklich toll gsi, aber naja hans überlebt. Ich han kei föteli gmacht, weg Handys det ned gern gseh sind und wegs mier, wie gseid ned wirklich guet gange isch. Zum zeige, han ich euch es Gruppebild. Det gsehnder dass es reecht viiil Japaner gsi sind (de ander europäisch Typ isch eine vo de Supervisor gsi)

I'm fine and I have no reason to complain about something. School is okay and I have a really good time with my family.
The last week we had an Internet restriction at home. Because we used more data than allowed in September, we had to restrict ourselves, so that it don't get expensive. Was a hard time without Facebook and co. But I survived it.
On the last weekend I was on a camp trip with some other exchange students. I was there with 10 Japanese People and four european girls. To be honest, I didn't really enjoy it. I didn't took any photos, because cell phones were not allowed to use and as I said, I didn't had a good time. The only picture I have is this group picture.

Susch isch eigentlich nüt speziells gloffe die wuche. Am fritig han ich für mini Family en Rösti mit Züri Gschnetzletem gchochet. Und s isch mer sogar meh oder wenig glunge. Au wenns timing zwüsche Rösti und Fleisch ned wirklich ufgange isch (han no müesse Zwible röschte und hans natürlich uf de letscht möglich Moment usezögeret). Au wenns für Schwizer Verhältniss wahrschinlich ned perfekt gsi wär, es hed amu glänget zum de Kanadier z zeige, was en richtigi Rösti isch. Aber wie mer Rösti richtig usspricht, han ich ehne ned chönne lehre (sie segeds irgendwie öppe Rousti).

The rest of the week wasn't special. Except, that I cooked a special swiss meal for my hostfamily on friday. Its called "Rösti". It's hard to describe how you pronounce this. I cooked it together with meat called "Züri Gschnetzlets". It wasn't perfect compared to Switzerland, but it tasted good, so I was satisfied.

Ich meld mich da mal wieder nechst wuche, villicht.

Bilder :)

Sorry, dass ich mich jetzt länger ned gmeldet han. S bruucht halt emmer Zit, und die han ich ned immer. Vorallem bin ich extrem schlecht im regelmässig Föteli mache. Han also zersch no Föteli gmacht ide Schuel. Wegs det au no es Cell-Phone-Verbot hed, han ich zersch die offiziell Erlaubnis brucht vom Principal. Meh chas au kompliziert mache. Ahja, das mal sogar en englischi Übersetzig :)

This is the first post with an English Translation. I don't translate word for word, but the meaning is more or less the same. Up there, I wrote that I was really lazy in the last weeks with renew the blog and that I needed  the official permission from the principal for taking pictures in school.

Am erschte Tag nach de Akunft simmer ja bekanntlich go d Niagara Fäll aluege. S isch wirklich extrem beeindruckend gsi.

On the first after my arrival in Canada, I went with the other exchange students to the Niagara Falls (you pronounce that in extremely weird way). It was really impressive.

Be de Niagara Fäll heds recht vill freilaufendi und ned wirklich ängstlichi Eichhörnli gha. Die hend eim sogar us de Hand gfresse.

This squirrel I saw in the park next to the Niagara Falls. There are some of this squirrel and they even feed from your hand.

Am nächste Tag hemmer en Stadtrundfahrt in Toronto gmacht. Es wär eigentlich ganz guet gsi, aber leider isches öppe 32° heiss gsi. Also recht vill z heiss gsi.

On the next day, we had a Sightseeing-Tour through Toronto. It's a really nice city, but it was nearly 32°, so I couldn't really enjoy the tour.

Zersch mal de CN-Tower vo unde. 

Of course, the CN-Tower was part of the Sightseeing.

Denn im CN-Tower. Da het mer wirklich en extrem gueti Ussicht über die ganz Stadt. Ich ben no nie ufemene so grosse Turm gsi, also isch das recht iidrücklich gsi für mich.

We were also in the CN-Tower. We had a very good view up there. I wasn't on a such a big tower before, so it was quite impressive.

De Glassfloor. Recht en Adrenalinschub gah det droff. Beängstigend dezue, das wemer druf umehüpft, s Glass au no vibriert.

The Glassfloor. A really good idea. When you jump on the glass it vibrates, that was quite scary.

Das isch s Huus vo minere Gastfamilie. S gsehd recht riesig us weg de drü Garage, aber in fact isches ned soo gross. Chli grösser als dihei, aber ned wirklich.
The House of my host family. It seems to be very large, but without the garages, it's just slightly bigger than at home.

Das isch de chlini Garte vo minere Gastfamilie. 

The garden of my host family.

Das isch de Tache, de Hund vo minere Gastfamilie. Er isch scho recht alt, aber er isch meistens recht en nette und ruhige. Nur mängisch dued er halt de Wind abbelle oder so.
This is Tache, the dog of my host family. He is already quite old, but he is a nice and quite little dog.

 Ussicht über Collingwood und Umgebig. Es isch recht grüen da, aber de besti Skiberg vo Ontario isch für Schwiizer Verhältnis, naja, mickrig :P. Links gsid mer eine vo de grosse See. Collingwood liegt a de Georgian Bay. S Frachtgschäft, wo da mal recht gross gsi isch, isch nümm existent und so chamer jetzt au im See bade. S Wasser isch ned salzig und recht ähnlich zu de Schwiizer Seee.

Overview over the area around Collingwood. The translation is mainly for the Canadian people, so I don't have to explain more.

Jetzt chömemer zu de Schuel. Wie ich scho erwähnt han, han ich extra en Bewilligung vom Principal brucht zum da döffe Föteli z mache. Das obe isch d Igangshalle vo de Schuel. Graduus isch grad d Cafeteria. D Schuel hed meh oder weniger 900 Schüeler. S System isch wie beschriebe andersch und chli gwöhnigsbedürftig.

Again, I don't have to describe a lot in english, because the most of my english-speaken readers know this school. I'm getting used to the new system here and I began to like it.

D Cafeteria. Die hend da recht luschtigi Tisch-Bänk. Mit eim chline griff chamer d Tisch zu Bänk umfunktioniere. Recht mulitfunktional.

The cafeteria, as you may know.

D Locker in amerikanisch-typischen Ugseh. D Locker funktioniered recht komisch und meh brucht training zum die rechtig z bediene, aber nach gli vier wuche han ich mich dra gwöhnt.

The typical lockers for north-american schools. In Switzerland we don't have this kind of lockers. The lock is a little bit curious to handle with it. But after nearly four weeks I can handle it.

D Portable Class Rooms usserhalb vom Schuelhuus. Komischi Idee für d Schüeler unterzbringe, vorallem wegs ned nur en Überganslösig isch. Aber, naja, es funktioniert, also wieso ändere.

The portable class rooms. Another things I had to get used to it. I find it a little bit weird for a long-time solution. But it works, so why change it.

De "Space-Bus" wie s d Schüeler da nenned. De gsehd aber nur vo usse modern us, inne dra ischer ned andersch als jede andere Bus.
The students said to me that they call this bus "Space-Bus". Yeah, it's not a typical School Bus, but it's not that futuristical.

So, Ende der Fotoschau. Ich bin sehr schlecht im regelmässig Föteli mache, also sorry, dass ich niened uf de Bilder bin und s generell recht wenig Bilder sind. Aber die wo mich kenned, wüssed das ich ned gern uf Bilder bin.

So, I'm finished. I'm on none of all the pictures. I don't like to take pictures and I don't like to be on them. Don't expect me to take more photos in the future. I would be urged to do that.

S Lebe da lauft, s meischte wird scho langsam zum Alltag. Murn ghads zum erschte Usflug mit YES Canada, de Organisation da in Kanada. Mit andere Uustuschschüeler ghads is Camp Kandalore. Wird sicher luschtig.     Wenn er mal meh wend erfahre, wie s mier ghad, söll sich doch bitte Skype zue tue, so dass mer Skype chönd. Schribe gahd emmer so lang, und ich rede lieber.

So, the live is going on and it gets everday life more and more. Tomorrow I'm going on an trip with other exchange students to Camp Kandalore. This will be fun hopefully.

Ersti Wuche überlebt und scho fahds ah Routine z werde

Fasch zwei wuche bin ich scho weg und jetzt han ich au die erscht Schuelwoche heil überlebt. Au wenns stressig und nid immer eifach gsi isch.
Am Zischtigmorge bin ich de mit minere Hostmother id Schuel gfahre. Leider gah ich ned i die glich Schuel wie min Gastbrüeder und mini Gastschwöschter. Us irgendwelchne organisatorische Gründ isch das ned möglich, hed d Organisation behauptet.
Ich ha mier einigi Gedanke zu de neue Schuel gmacht. So à la "Oh Gott, en katholischi Schuel, das werd ich ja nie überlebe!" Aber ich ha mier au vorgstellt gha, dass d Schuel uf mich vorbereitet isch, also dass d Lehrer wüssed, dass es das Jahr en Uustuschschüeler hed. Wirklich vill Ustuuschschüeler heds nämlich ned. Nebe mier heds no en Welschschwizer, wo aber nur für 2 Monät da isch. Aber leider isches ned so gsi. Mier sind als erschts is Guidancebüro gange, wo s mich zersch mal gfragt hend, wer ich bin, wieso ich da bin und wo ich gseid han, dass ich da uf Exchange da bin, hends mich ganz verwunderet gfragt: "Oh, really?" "Yes, really or do you want me to go home?", het ich ihne am liebschte gantwortet. Die völlig überarbeitetet Sekräterin het de zersch mal ihre riese Huufe ah Blätter dursuecht und finally en chline Zettel mit mim Name druf gfunde. Denn han ich zäme mit de Hostmother müesse es riesigs Formular mit Date usfülle, wo die Schuel scho laang hetti, wenns denn irgendwie chliii vorbereitet gsi wäred. Schlussendlich han ich de mini Schuelfächer gwählt: Ersts Semester: Bio, Englisch, World Religione (einzigs Pflichtfach) und Mathi. Zweits Semester: Franz, Fotografie, Chemistry und Gym. Sowit eigentlich ned schlecht. Ich muess villich fürs bessere Verständnis s kanadische Schuelsystem no chli genauer erkläre:
Pro Semester hend mer 4 Fächer. Jede Tag hemmer die glich Timetable, also Zersch Fach A, denn B, C und D. I mim Fall also zersch Religion, denn Mathi, Englisch und z letscht Bio. Das isch Wuche eis. Ide Wuche 2 wechselt A mit B und C mit D, also d Reiefolg: BADC, für mich also: Mathi, Religion, Bio und z letscht Englisch. Nach de Wuche 2 chund de weder Wuche 1, usw.
In Kanada gits kei "Klasse" wie ide Schwiiz. Jede Schüeler hed sin individuelle Stundeplan, je nach dem welli Fächer er gwählt hed. Das heisst also, ich ha nid mit de gliche Lüüt Religion, wie ich Mathi han. S Blöde dra isch, dass es so recht schwirig isch für mich, Lüüt kennezlerne und mich in en Gruppe izgliedere.
Aber witer im Takt. Nach de Registration, han ich mier müesse en Uniform go uslehne, wegs ja leider a dere Schuel so Pflicht isch. Sie hend mich de zumene Schrank mit alte Uniforme bracht, wo aber ganz offesichtlich nie oder nur sehr schlecht gwäsche worde sind. Was sie det zum Teil für Chleider usezoge hend, brrr! Aber ich han de doch no Shorts und es Polohemd gfunde, wo einigermasse suuber gsi sind und relativ guet passed.
Mini erscht Class isch English gsi. Leider hed die scho agfange gha, bevor ich bereit gsi bin, also hed mich de die Frau vo de Guidance zum Schuelzimmer gfüehrt und aklopft. D Lehrerin hed de churz en Erklärig becho wer ich bin und das ich jetzt i dere Klass bin. Im Schuelzimmer hed sie mich denn de Klass vorgstellt: "This is Lukas, he is on exchange here from Switzerland." Zack, sind guet 30 Blick uf mich grichtet gsi. Han mich glaub selte so beobachtet gfühlt während ere Lektion. S erschte wo ich denn i dere Englisch Class gmacht han, isches Quiz, also en chlini Prüefig schribe. Perfekte Afang!
Hans de schlussendlich doch überlebt, genauso wie all die andere Fächer au. Schlussendlich kenn ich jetzt scho einige Lüüt und hans scho recht guet.
Usserhalb vo de Schuel han ich mich jetzt au scho recht iglebt und s Lebe wird immer je meh wieder zu Routine. Au wenn ich ned s Gfühl han, dass sich mis Englisch scho sehr verbessert hed, denk ich, dass der Exchange öppis guets isch. S isch ned wirklich eifach und au ned so Schoggilebe wie s mier einigi beschribe hend. Aber trotzdem isch alles Guete und Schlechte en Erfahrig wo ich muess mache und ich hoffe, dass ich au öppis drus lerne.
S einzige katholische wo ich i dere Schuel gseh han, ischs Gebet wo s am Morge jewills über Luutsprecher abe betet. All die harte Regle, so apropos, Fraue döffed ihri Röck ned höcher als 8 Zentimeter überem Chnü si, werded konsequent vo allne Schüeler ignoriert. Am Morge wird au "Oh Canada", die kanadisch Hymne, abgspillt und dazue muess mer natürlich ufstah. Am Endi vom Jahr chan ich de wahrschinlich die kanadisch Hymne besser chönne als die Schwizerisch :D.
Morn isch Soccer-Try-Out, und ich hoffe, dass ich s Team schaffe. Wott schliesslich chli Sport tribe da und wenn ichs ned schaffe, isch die ganz Uusrüschtig wo ich ha müesse chaufe, für nüt gsi.
S geb no vill meh z verzelle, aber für das han ich eifach ned Zit, weg ich natürlich bereits zwei Presentations als Huusufgabe han. Eini über Schwämm in Biologie (das isch ned mal eifach uf Dütsch!) und eini für Religion.
Wird mich de inere wuche oder so mal wider melde, lueged eifach ab und zu mal ine.